سرائیکی شاعری ،تیکو ں ٹھہندی اے ،بے مُل، قدر شناس، کیا جیوے ، میڈی خیر ہے ، نا واقف ، ساہ آیا کر ،

 

تیکو ں ٹھہندی اے 

میں من گھنداں توں سو ہنڑاں ہیں پر چلدا سوہنڑی  چال نوہی

تیَں پیار دی ساڈے نال سجنڑ  کیتی پکی ہک وی گال  نوہیں

ساکوں یار ٹھگئی تیں  رکھیا ہے  ڈس   لایا کیوں ہاں  نال نوہی

ساکوں چھوڑتے غیرکوں  گل لانویں  تیکو ں  ٹھہندی اے جانی نوہی

بے مُل 

ساڈے نال او پیار  کریسی کیا اوندی شان کولوں اساں جِھکّے    ہَیں 

اساں کم اوندے کیا آونڑاں ہے بیکار تے  کھوٹے  سِکّے   ہَیں

دیدار وی چن کرویندا نئیں  نِت وَل آندے  کھا دِھکّے   ہَیں

ساڈا مُل  جانی  اوں نئیں پاتا  جیندے ناں  توں  بے مُل وِکّے ہئیں

قدر شناس

نہ دل وچ رکھ  توں  گالھ  کوئی  ڈے  دِل دی گالھ اظہار توں  کر

نہ گھن توں  مشورہ کہیں کولوں بس  اپنڑے   دِل  دی  یار  توں  کر

پندھ  پیار  دا  گاٹے  پئے  ویندے  نہ  زندگی  کوں دشوار  توں  کر

جینکوں  پیار  دی  قدر شناس  ہووے بس  جانی ہونکوں  پیار  توں کر

کیا جیوے 

جہنڑی کر گے میڈے نال سجنڑ  کہیں  دشمن  نال وی نہ تھیوے 

ہے ول وی  روز دُعا  میڈی  او  جام  خوشی  دے  ونج  پیوے

ہووے  جانی   کم  جیندا  زخم کڑنڑ  کیویں  تھی  سگدے  او پھٹ  سیوے

جینکوں  جیندیں   چھوڑ سجنڑ  دیوے  او جیوے  تاں  بھلا  کیا  جیوے

میڈی  خیر ہے 

کلھ کون  ہا  دِلبر  نال تیڈے  ہاویں  توں جیندے  سئیں نا ل   ودا

تیڈی ہر  میں   چال  سمجھدا  ہاں  چل جہڑی وی  توں  چال  ودا 

میڈے  دِل  وچ  فرق  نی   آ سگدا   کر جو  مرضی  لجپال ودا 

میڈی خیر  ہے  جانی  بچ  پوساں  ونج  غیر  دے  ونڈ  توں  ہال  ودا

نا واقف 

تیڈیاں  کیتیاں  کوئی ساکوں  نئیں  بُھلیاں  ساڈی  ہر کیتی  چا ونجائی  ہے تَیں

ساکوں  ہر  جاہ  تیں  رُسوا  کیتے  جند  مہنڑیاں وات  ڈیوائی ہے تےتَیں 

ساکوں سمجھ نی  آندی   نال ساڈے  کہڑی  کیتی  یار چنگائی  ہے تَیں

ہاسے جانی  عشق  توں نا واقف  ساڈے  ہاں کو ں  بھا  چالئی ہے تَیں

ڈتی  دولت  کوں  ترجیح  ہے  تَیں  کردار  دے  بارے  نئیں سوچا 

ہر  سوچ  اَنویں  تَیں  سوچی  ہے  پر پیار  دے  بارے  نئیں  سوچا 

تیڈا  پیار  کیہاں  تَیں  دل والے  دِلدار  دے بارے نئیں سوچا

 

وَدا   رُلدے  جانی  یار  تیڈا  تَیں   یار  دے  بارے  نئیں سوچا

ساہ  

اے سیجھ پُھلاں دی نئیں  ڈھولا  ہے عشق  دا  راہ  اے  سوچ  گھنیں

اِتھ ویری  پیار  محبتاں  دے  مِلدن  ہر جاہ  اے  سوچ  گھنیں 

ننگے  پیر  وی  ٹُرناں پوندا  ہے  اُتے  بلدی  بھاہ اے  سوچ  گھنیں

پندھ  مُکدا  جانی  پیار  دا  نئیں  مُک  ویندن  ساہ  اے سوچ  گھنیں

 آیا کر 

ایویں  چلدا    راہسی   دنیاں  دا    اے   کاروبار  توں  آیا  کر 

تیڈا  گھر  ہے  تھیوے  جیں  ویلے  تیڈا  دل  دلدار  توں  آیاکر

تیڈے  باجھ  بیا  ایں  دنیاں  دے  ساڈا  کون  ہے  یار  توں  آیا  کر  

بیا  نہ  تا ں  جانی  ہفتے  وچ  لنگھ  ہک  اَدھ  وار  تو  آیا  کر   

 

محمد شعیب