سرائیکی شاعری ،غم بھُل ویندے ،انجام، پیار ،کھٹّی پیار دی ،وعدہ ، مجرم ،دشمن ، آخری خواہش ،احساس ،رشتے

 

غم بھُل  ویندے

بھانویں  جتنا  وی پریشان ہونواں  توں  پُوندیں  مِل  غم بُھل  ویندے 

تیکوں  ڈیکھ  تے  خوش  تھی  ویندا ہے  ساڈا  دلبر   دل  غم  بُھل ویندے

ساڈے  مونجھے  چہرے  تے  جانی  آ  ویندی  ہے  کِھل   غم  بُھل ویندے

تیکوں  ڈیکھ تے  حل  تھی  ویندی  ہے  ساڈی  ہر  مشکل ، غم  بُھل ویندے

انجام

ساکوں  ساقی  نہ  ترسا  اَج  تاں  بھر بھر  توں  جام  پِلا  بیٹھا 

نصیب  متاں  دل  میڈے  کوں  تھی   پووے  آرام   پِلا  بیٹھا 

نہ  کر  میڈیاں  جذباتاں  کوں   دِلبر  نا  کام      پِلا  بیٹھا

میں  جانی   جیونڑاں  نی   چہندا  نہ  سوچ  انجام   پِلا  بیٹھا  

پیار 

تیڈی  خاطر   وانگ  فقیراں  دے  اساں  ویس  وَٹائے    توں  ملیا   نیں 

گل  گودڑی  پیریں  گُھنگرو  پا  ہتھیں  کاسہ  چائے    توں  ملیا   نیں 

کہیں  ٹوک  مذاق  دا  گالھ  کیتی  کہیں  جھنڑک  اَلائے    توں  ملیا   نیں   

تیڈا  جانی   پیار   میں  پاونڑ   لِیوں  توڑے  حال  ونجائے    توں  ملیا   نیں 

کھٹّی  پیار  دی 

میڈے  کولوں   ہر  کوئی  آپُچھدے   کیوں   رو   رو  نیر   وہائی   بیٹھیں 

ہے  کون  او  جیندی   خاطر  توں  ڈس  اپنڑاں   حال  ونجائی    بیٹھیں 

کیا  تھی  گے   گالھ  ڈسا  کوئی  تاں  کیوں  سِر  وِچ   مِیٹیاں   پائی    بیٹھیں

توں  ڈس  نہ   ڈس  محسوس   تھیندے  کھٹّی  پیار  دی  جانی   چائی   بیٹھیں 

وعدہ 

اَج  ویندا  پیں وَت  ڈھول  کڈاں  توں   یار  آسیں  تیڈی   تانگ  رکھاں 

ڈے  دِل  کوں  حوصلے   جیساں    پئی  من   ٹھار   آسیں    تیڈی   تانگ  رکھاں

ڈس   درد  ونڈا ونڑ   توں  میڈے  غمخوار   آسیں   تیڈی   تانگ  رکھاں 

کر  وعدہ  جانی   میڈے  نال   کہڑے  وار  آسیں  تیڈی   تانگ  رکھاں

 مجرم 

نہ  ڈینہ  کوں  چین   نصیب   تھیوے   نہ  آندی  رات  کو  گھِل  اے

میکوں  مجنوں   مجنوں  لوک  آہدن  بنڑ   لوکاں  دی  گئی  کھِل اے 

ساڈا  وارث   رب   ہے   اوجانڑے  ونج   غیراں  نال  توں  مِل  اے

تیڈا  جانی   یار  قصور  نی  کوئی  میڈا  مجرم   بس   میڈا  دل   اے 

دشمن

  

ڈے  خون  جگر   دا  ہر  ویلے  میں  بوٹے  پیار  دے  پالے  ہِن 

اوں  کیتی  نی   پروا  میڈی  راہ   جیندے  نِت  میں  بھالے  ہِن

میڈی  جھوک  نی  تھئی  آباد  وَلا  لگے  ایجھیں  سیئت  کو  تالے  ہِن

آیا  جانی  پیار  نی  راس  میکوں   بنڑ  دشمن  گئے   گھر  والے  ہِن 

 آخری   خواہش 

میڈا  دل  بے قابو   تھی  وینے   آوے  یاد  جڈاں  اوندا  پیار  میکوں 

جہڑا  واقف  اَزل   توں   ہئی  میڈا،   اَح  جانڈا  نئیں  او  یار  میکوں 

میڈا   سئیں  جو  ہے  اوندی  مرضی  ہے  او   بوڑے  یا  ڈیوے  تار  میکوں 

اہیا  جانی   آخری  خواہش    ہے  میڈی  لاوے  گل  چا  بس  دیدار  میکوں 

احساس

 

جینویں  میکوں  چن  تیں   دور  کیتے  ایویں   توں  وی  کہیں  توں  دور  تھیویں 

نہ  درد  سُنڑے کوئی   بہہ  تیڈے   توں  بے  وس  تے   مجبور  تھیویں 

تیکوں  تیڈے  احساس   جدائیاں  دا  ایں  درداں  وچ   توں  چور  تھیویں 

میڈا ناں  جانی  جیویں  تَیں  کیتے  شالا  توں  وی  چن  مشہور  تھیویں   

 

رشتے 

تیکوں  سُکھ  ڈیونڑ  دی  خاطر   چن  میں  اپنڑاں  امن  ونجا  آیاں 

تَیں  کیتی  نئیں  پروا  میڈی  میں  ڈیکھ  سجنڑ  کرکیا     آیاں

نہ  سمجھا  پیار  تیں   پیار  میڈا   کر  کہڑی  ڈھول  خطا  آیا ں

تیڈی  ذات  دی  خاطر   سب  رشتے  میں  جانی  اج   ٹھکرا  آیاں