شالا خیر ہوی ,صبر , پاگل ,دل دی کوٹھی , چرچے ,عرش خدا دا ,جھنگ , اَکھیں ,سرائیکی شاعری

 

شالا  خیر   ہوی

اَج  ساقی  اکھ  دے  میخانے توں جام  پلا  شالا  خیر  ہوی

میڈی  سِکدی  روح  نہ  کر  جینویں  قتلام    پلا  شالا  خیر  ہوی

ونجاں  بُھل  میں  ڈکھیں  دردیں  دی  ہر  شام  پلا  شالا  خیر  ہووی 

نہ  جگ  دنیاں  توں  ڈر  جانی  شرے  عام   پلا  شالا  خیر  ہوی

صبر

اے  گھن  میڈی  رَت  حاضر  ہئی  ہتھ  اپنڑے   ڈھول  رنگیندا  رہ 

میڈی  طرفوں  عام  اجازت  ہئی  چُھری  دِل  تے  یار  چلیندا  رہ 

بھانویں  توڑ  نبھا  توں  نال  میڈے  بھانویں  میکوں  چھوڑ  تے  ویندا  رہ 

میں  صبر  دے   نال  نبھائی  راہساں  جیڈے  جانی  ظلم  کریندا  رہ

پاگل 

میکوں  علم نہ  ہا  او  چھوڑ  ویسی    جیکوں   پیار  کریساں  ایڈا    میں

ہامی  سوچیا  جو  او   سمجھ   ویسی   اونکوں   بہہ   سمجھیساں    ایڈا   میں  

میکوں  اپنڑا ں  وی   اعتبار  نہ  ہا  جو  وقار  ونجیساں  ایڈا   میں 

نہ  سکھ  ہا  ئی  جانی   عشق  دے   وِچ   تھی   پاگل  ویساں  ایڈا  میں

دل  دی  کوٹھی 

ہے  نیت  چنگی  سئیں  تار  ڈیندی  توں  چنگیاں  ہر  دم  نیت  اے  

رُس  ویندا  ہر   بخت   ہے  یاد  رکھیں  تھیوے  جدنڑ  نیت   پلیت  اے

چنگی  نیت   جڈاں   وی   کر  گھنسیں ویسیں  ہر   میدان   تو ں  جیت   اے

رکھ  دل   دی  صاف  جانی  اے  دل  ہک   پاک   مسیت   اے

 چرچے 

میں  زخم  لُکائے  ہِن  ہر  پاسوں  رکھیے  درد  ہم  سانبھ  جگر   وچ 

میں   خاب  ڈٹھے  ہَن  خوشیاں  دے   اوندی   سوچ  ہئی  شامل   شر   وچ

ہے  میڈی  کیا    اوقات  بھلا  اوندی     قاتل  یار  نظر   وچ

ساکوں   جانی    اپنڑاں  گھر    بھل   گئے  اوندے   چرچے  ہن  گھر  گھر  وچ

عرش  خدا   دا 

ہامی  ڈھیر  چالاک  میں   دنیا   تے   پر  چکر   ایجھاں  کوئی    چل   گئے 

گئے  بنڑ   دشمن  کیوں   یار  میڈا   رَت  روندیں   چیتا  رل  گئے

لگیا      پُھل    پَھل   نی   میڈی   محنت  کو  ں   کم   بنڑیاں   جُڑیا  گل   گئے

بے   درد   نی   جانی    ترس  کیتا   بھاویں   عرش   خدا   دا   ہل    گئے

جھنگ

  میڈا  سانولا   رنگ  اوندا   بھورا  ہے   اونکوں   بھورے   رنگ   تے   مانڑ   اے 

جہڑی  بانہہ   وچ   او   ودا  پاتی   ہے  اونکوں   اپنڑی   ونگ   تے   مانڑ   ا ے

بے   درد  پُھلا   کو ں  کیا    جانڑے   بے  درد   کوں   سنگ  تے   مانڑ   اے 

توں  خبر   نی   جانی     کِتھ وسدیں   اونکوں   سارے   جھنگ  دے  مانڑ  اے

اَکھیں

ڈے   ہجر  دی   بھاہ   وچ   بُھجنڑ    میکوں    نہ     پیار   دا    پالا    پوونڑ   ڈے 

ڈے   وَکھرے  سجنڑ  اج   درد   میکوں   نہ  جاگنڑ  ڈے   نہ   سوونڑ   ڈے 

میڈا   فائدہ   سوچ   نہ   کوئی   اصلوں  نقصان   جو  تھیندے   ہوونڑ   ڈے 

میڈیاں   اَکھیاں   جانی   روونڑیاں  ہن   اِنہاں   روونڑیاں  کوں  بس  روونڑ  ڈے